ऐका गणेशा तुमची कहाणी.
निर्मळ मळे, उदकाचे तळे, बेलाचा वृक्ष, सुवर्णाची कमळे,
विनायकाची देवळे-रावळे. मनाचा गणेश मनीं वसावा.
हा वसा कधी घ्यावा? श्रावण्या चौथी घ्यावा. माही चौथी संपूर्ण करावा.
संपूर्णाला काय करावं? पशा-पायलीचे पीठ कांडावं, अठरा लाडू करावे,
सहा देवाला द्यावे, सहा ब्राह्मणाला द्यावे, सहांचं सहकुटुंब भोजन करावं.
अल्पदान महापुण्य असा गणराज मनी ध्याइजे, पाविजे, चिंतिले लाभिजे,
मनकामना निर्विघ्न कार्यसिद्धि करिजे.
ही पाचा उत्तरांची कहाणी पाचा उत्तरी सुफळ संपूर्ण.
